പ്രായത്തിന്റെ രുചി

 

ഒരു ബാർ കൌണ്ടർ ആണ് വേദി. എന്തെല്ലാം ജീവിതമുഹൂര്തങ്ങൾ ഇവിടെ വിരിഞ്ഞിട്ടില്ല? എത്ര കണ്ടുമുട്ടലുകളും വേര്പാടുകളും ഇവിടെ രൂപമെടുത്തിട്ടില്ല? വേണ്ടപ്പെട്ടവർ പിരിഞ്ഞുപോയ ദുഖവും ഉണ്ണിയുണ്ടായ സന്തോഷവും ഒരുപോലെ കൊണ്ടാടാൻ പറ്റിയ വേറെ ഏതു തട്ടകമാണുള്ളത്?

 

പുളുവടിയും വീരവാദവും വീരശൂരപരാക്രമവിവരണങ്ങളും ഇവിടെ നിത്യസംഭവം.

 

ഇന്ന് പക്ഷെ ക്യാപ്റ്റൻ കൗണ്ടർ ചാരി നിന്ന് വെറുതെ പുളു അടിക്കുകയല്ല. ടീ ഷർട്ടും ബെറെ തൊപ്പിയും ധരിച്ചു (പാന്റ്സ് ഇവിടെ നിന്നു കാണാൻ പറ്റുന്നില്ല) എല്ലാം തികഞ്ഞ ഒരു ഹീറോയുടെ പരിവേഷത്തോടെ പുഞ്ചിരിച്ചുകൊണ്ട് അദ്ദേഹം വര്ഷങ്ങളുടെ സൈനികസേവനസപര്യയിലൂടെ ആർജിച്ച ഒരു നൈപുണ്യം പ്രദർശനത്തിന് വെച്ചിരിക്കുകയാണ്.

 

ഓരോ സോമരസോപാസകരും അവരുടെ ചഷകം ക്യാപ്റ്റന്റെ മുന്നിൽ വെക്കുന്നു. ക്യാപ്റ്റൻ അതിൽ കയ്യിട്ടു രുചി അറിയാൻ വേണ്ടി മാത്രം ആ കൈ നക്കുന്നു.

 

ഇത് ബക്കാർഡി റം 1970 നിപ്പുറം. അതിന്റെ ആൾ വലതു കൈ പെരുവിരൽ ഉയർത്തി തംസ് അപ്  കാണിച്ചു

മടങ്ങുന്നു.

 

വേറെ ഒരു കുടിയന്റെ ഗ്ലാസ്. ക്യാപ്റ്റൻ രുചിച്ചു പറഞ്ഞു: ഇത് ഓൾഡ് ടാവേൺ വിസ്കി 1985. അയാൾക്കും സന്തോഷമായി.

 

മൂന്നാമത്തെ ആളുടേത്  ബ്രാണ്ടി. VSOP. വെറും ഒരു കൊല്ലം മാത്രം, പുതിയത്. എന്നിട്ടു VSOP ക്കു സ്വന്തം പൂര്ണരൂപവും പറഞ്ഞു  കൊടുത്തു ക്യാപ്റ്റൻ: വാസുവുക്കും ശരവണനും ഒരേ പൊണ്ടാട്ടി.

 

പിന്നെയും കുറെ ആളുകളുടെ അഭ്യർത്ഥന കൈകൊണ്ടു അവരുടെ പാനീയത്തിന്റെ പ്രായം അദ്ദേഹം അണുവിട തെറ്റാതെ അനുമാനിച്ചു.

 

രണ്ടു വിരലുകൾ കൊണ്ട് തന്റെ ഗ്ലാസിന്റെ വക്കുകൾ പിടിച്ചു പിടിച്ചില്ല എന്ന മട്ടിലാണ് അടുത്തയാൾ വെച്ച് വെച്ച് വന്നത്. ജോണി വാക്കർ പോലെ നിറം. ഗ്ലാസ് അയാൾ ക്യാപ്റ്ററിന്റെ മുന്നിൽ വെച്ച്. സ്റ്റഡി ആയിട്ടില്ലാത്ത തല കൊണ്ട് ക്യാപ്റ്റനെ നോക്കി. എന്നിട്ടു ഗ്ലാസ്സിലേക്കു ആംഗ്യം. ഹ് o....

 

ക്യാപ്റ്റൻ അതിൽ കയ്യിട്ടു ഒരു തുള്ളിയെടുത്തു നക്കി. ഉടനെ തന്നെ തുപ്പിക്കളഞ്ഞു. എന്താ ഇത്?  താൻ ഇതിനു ഗ്ലാസ്സെ കണ്ടുള്ളു?

 

അയാൾ പറഞ്ഞു: ഉത്തരം വരട്ടെ. എനിക്കെത്ര വയസ്സായി?